شجابك ياحلم

الجمعة مارس 02, 2012 1:26 am

شجابك يا حلم لا..!! ورجعتلي ليش
تهيج اجروح نامت عمر تتحسر
بعد مات الكلب راجع علي شتريد

هسة الشوك هزك كمت تتذكر
مااكدر بعد من النهاية ابديك
...ولا من البداية ابديك مااكدر

بعيونك غفيت وصحتك انه بشوك
وماهزك حنين وكلب يتفطر
وينك مو بيدك جنت مثل الحمامه اطير

بس هسه تجتف جنحي وتكسر
حرام تفك جرح بيدك جنت تجويه
وانته اعله اليضمدك جنت تتبطر

كافي ارجوك حملك هدني حيل الحيل
مابيه قهر وهموم بعد اكثر
ولاتبجي بعد مايرجع اللي راح

وكافي عليك ابجي واتعب واسهر
ارحمني دخيلك كافي خلني ارتاح
ودورلك محب عليك يتعطر

اهواية من البشر صدكني يتمنوك
وعدهم حلم انته وحلم تتفسر
اليرسمك عالجرف بالروج لتجازيه

وتدوس احلام خلصت عمر تتحضر
وانه همومي ثكيلة وظهري منجل صار
وظهرك سيف سل وووجهك مدور

وتمثيلك قريتة وبيك شفت افلام
تحبس لهفتك وبدمعه تتنكر
من اذكر حنيني وكبر ذاك الشوك

اظل امطر دمع من عيني يتفجر
ومن اذكر لهفتي وذاك تعبي الراح

الف جمرة قهر وبروحي تتوجر
دمرني غرامك والغرور البيك
بعد شتريد مني ابيش أتدمر