الطالبه كتبت عام 2003 للشاعر كرار العامري

الجمعة أبريل 01, 2011 4:12 pm

الطالبه

الحسن عدهه..الشعر عدهه..
وشعرهه الحني لون الحنه،،
حته الحنه من عدهه
ومن سحر الخليج أعيونهه الوسعات..
بس بيهن بحر مغضب،،
مثل برموده لو رمشت ابخزرتهه

كَصايبهه..سعف برحيه لوجاهه الهوه ايركّصن كَصايبهه

اليكَابلهه.....بعد مترين بينت صورّته بخدهه

شفايفهه..زغيره ومثل جكليتات،،
وكل شفه مثل قداح ريحتهه
تحت ألسانهه تلكّه علج نعناع
من تحجي لذيذه إوياك كلمتهه
وأذا صاحت نعم بالصف،،،
يكَع حته المدرس من نعومتهه

صحن صيني لجن مرمر!!
وجهه ايشعشع امدور !!

وطلعتهه شمس بالهندس المسكون..
حتى الكَمر حاسدهه

وصورتهه..مثل حوريه صورتهه
طبيعيه بلا مكياج من الباري حمرتهه

وأذا تاخذ أشعه ألهه........!
أبد ماكو عظم يطلع بشعتهه

أبتسامتهه عجب والله تداعم الناس من ابتسامتهه

أبو اللوري دعم تكسي..
أبو البيكم دعم حايط..

بعد ماله غرض بالاخضر واحمر،،
لأن ينتظر من عدهه أشارتهه
وحكَهه الناس تداعم..والي ايشوفهه أيّتيه،،
يعوف ابنه العله جتفه ويروح ايشيل جنطتهه