منقول =بچت حته المدينه=

الأحد يوليو 24, 2011 6:28 pm

هذه القصيده رثاء لصديق عزيز على قلبي
وقد توفيت والدته في اول يوم من ايام العيد
بتاريخ 1996 ---
=بچت حته المدينه=

ييمه وداعتچ بعدچ بچينه
عگب عينچ بچت حته المدينه
عيد الناس حسيناه مو عيد
ملابس للحزن رحنه اشترينه
ييمه وداعتچ حته المراجيح
يوم العيد شفناها حزينه
مو بس بيتنا يا يمه زعلان
الدنيه بحالها زعلت علينه
بعد عينچ ييمه من رحلتي
حسينه الوطن ما راضي بينه
وحشه بكل كتر كل الشوارع
مثل وحشة العشره عد سكينه
شفنه ارواحنه مثل المساجين
واساره بلا سبي چنه انسبينه
تعودنه عليچ واحنه ازغار
واكثر من كبرنه اتعودينه
كبرنه ونسمع بصوتچ دللول
وچنه ازغار وبحضنچ غفينه
چنه بليلنه نضحك ونرتاح
وگلبچ بالقلق ميت علينه
ييمه من يتانينا على الباب
عگب عينچ اذا باليل اجينه
يافيض السيول بشحة الماي
يااول نهر منه ارتوينه
يابلبل يغرد فوگ الاحزان
ويطيرنه فرح ويطير بينه
يانسمة حنان بشحةالگيض
وبيام الشته بحضنچ دفينه
هيهات نتلاگه بمثلچ احباب
دورنه اعله مثلچ ما لگينه
ماضن بالرثاء تردچ اشعار
ولا دمعه تردچ لو بچينه

كلمات
ناصر اسماعيل الموزاني
الاهداء- الى كل ام رحلت
وكافحت الى النهايه من
اجل اولادها-----------