شعرك من تحله تكول جن طاووس

الجمعة مارس 02, 2012 1:51 am

كتلك اني احبك خلي كلشي يصير
لو اعرف احبك مني تطلع موس

ولان فانوس وجهك صرنه متقصدين
نطفي الكهرباء و نشعلك فانوس

وجهك لا تغسله و كظي يمنه الليل
على نور البوجهك نظل نقره دروس

بالقاموس ادور ردت معنى البيك
لكيت عليك هو يدور القاموس

خل ننسى المضى و نعوف الاوهام
و خل نحجي الصدك و نعيش بالملموس

كطرات المطر رجليك فوك الكاع
الكاع تصير رطبه شما عليه تدوس

تفاحه الحلك و اصغر بعد شوى
و ربك من خلقه شووويه شكه بموس

كلت بعيني ازرع شجره اليه تصير
و لان كلش حلو التمت عليك الفوس

بجمالك انته ابد لا ما اكول انسان
و اشك انته انخلقت بجنة الفردوس

و حتى من اهلك اني احذر و اخاف عليك
و اتمنى بغرفتك لو تضل محبوس

بلبل شعرك من تلمه انته تصير
و شعرك من تحله تكول جن طاووس

نكتل علمودك لو فصل عدوك
خاطر من تجينه نشيلك عله الروس

انته الشتمه عندك جنه تنزل تين
و احنه اترف حجينه تكول جن دنبوس

من تسلم عليه البوس خل نلغيه
تجلب بيك خاف خدودنه من تبوس

جنك مزهريه انته الله من سواك
مو بس ورد شايل طيبه هم متروس

من تمرنه علم نوكف بالاستعداد
الوادم و الوطن نوكف فرد كردوس

مو بس بالسما قوس القزح ينشاف
من تبلل شفافك بيه يطلع قوس